近排本地球圈喜事重重，先後有南華嘅伊達、保贊同謝家強各自嘅BB出世，噚日仲有南華隊長陳偉豪公佈太太有喜，至於傑志總領隊伍健嘅愛女伍怡欣（Jessica）雖然年底先結婚，但噚日就過大禮，真係喜事一籮籮。
今季港超聯受惠於港足世盃外連續三場主場爆滿，球市有起色，連帶球圈亦喜事重重，南華隊長陳偉豪喺fb透露太太Hana有咗佢哋第二個愛情結晶品，仲貼咗囝囝景堯（圖）拎住張超聲波相，偉豪留言話：「就嚟做哥哥啦，以後要幫手照顧細佬妹呀！」
偉豪復操又做老竇
國際足協噚日公佈最新世界排名，港足上月作客守和國足，但排名仍跌兩位到153。嗰場波陳偉豪踢咗幾分鐘就傷出，呢位港足隊長休息咗成個月後噚日復操，佢收操後話其實同太太有計劃追多個小朋友，始終兩個會比較好照應，至於係仔係女都冇所謂，最緊要健健康康，但如果係女就可湊成「好」字喎。
至於傑志班主伍健個細女、現任傑志項目經理Jessica早前宣佈今年12月5號同拍拖幾年姓李男友舉行婚禮；一對新人噚日過大禮。雖然儀式下午先進行，但Jessica同未來老公晨早準備，又燒豬又中式禮餅擺到成枱都係，真係恭喜晒。
