上月3日上京閱兵時非常風騷，仲獲國家副主席李源潮同港澳辦主任王光亞握手嘅前特首曾蔭權，噚日亦同老婆鮑笑薇一齊出席十˙一升旗禮同酒會，繼續從容，不時同身邊人交談，包括發展局局長陳茂波。佢喺台上祝酒時，亦先後同終審法院首席法官馬道立、林鄭月娥、曾鈺成、曾俊華等人碰杯；捲入涉貪案嘅佢離開時被記者兩度問及驚唔驚被起訴？煲呔輕鬆停一停步，轉身向記者微笑揮手至離開，似乎冇被「落鑊」陰霾影響。
而一向受歡迎嘅林鄭，噚日以一身白色輕紗登場，佢留喺酒會嘅時間喺官員之間算最長，唔少賓客捉住佢握手同影相，但此舉連累唔少傳媒，皆因政府新聞處要等全部司局長離開後，先畀記者離開「豬欄」自由採訪，當時唔少賓客已經走晒咯。