最近四川長虹電子邀請咗喺6月成為上海國際電影節金爵獎影帝鄧超加盟，唔單係代言人，同時係長虹CHiQ電視的產品經理，參與CHiQ產品的設計及研發。
先講吓鄧超背景，佢係內地男演員、電影導演，喺中央戲劇學院表演系畢業。較為港人熟悉嘅係佢喺中國版Running man，即係奔跑吧兄弟成員之一，港星王祖藍及Angelababy亦係成員之一。鄧超作為一個專業同當紅嘅演員，有幾多時間做產品設計，大家可以想像到。
呢個人事變動之所以引起筆者注意嘅係，舊年亦有一間公司以同樣方式聘請港星謝霆鋒，呢間公司就係達芙妮（210），除咗請佢做代言人之外，亦係創作總監，搵埋南韓女星全智賢拍廣告，風頭一時無兩。當時的確可以在市場帶出話題，但對於達芙妮嘅業績影響，似乎係兩回事。
謝霆鋒舊年4月成為公司代言人及創作總監，同全智賢一齊拍嘅廣告喺今年頭出街，今年上半年公司營業額按年下跌13.9%至43.7億元；純利更跌99%至250萬元，事實上達芙妮過去幾年業績表現均不太理想，謝霆鋒似乎未能為佢地嘅銷售帶來「沖喜」效果。
市傳達芙妮當時更用天價向謝霆鋒作出邀請，雖然未有透露實際數字，但今年公司銷售及分銷成本佔營業額比例由2014年上半年的47.7%上升至今年上半年的55.6%，達到24.33億元。而2013年同期比例為45%。當然呢24億幾元，仲包括全智賢，同埋新代言人劉詩詩。呢種宣傳效果係好定壞，真係見仁見智。
流氓