大摩即係大摩，呢位盃王練馬師，吼準今日季內首次有編排分級賽，佢即以開季以來最強陣容參戰，結果順利顯示盃王本色，第七場憑4.2倍落飛馬「新力風」出擊得手，守好位下彈甩兩身位，與愛將郭能聯手捧走1000米本地三級賽國慶盃，帶挈埋落飛黨大獲全勝。
郭能跑完第七場，已經憑葉廐「真慷慨」、東廐「正是你」、摩廐「新力風」中三元兼捧盃，領先騎師王，取得個人今季代表作。至於「新力風」馬主黃良柏，上月19日以公司名義贊助馬會舉辦冠忠巴士金禧盃，當日他冇馬贏，今次卻在國慶日捧盃補數。
上屆國慶盃由苗廐「積多福」配田泰安跑第三，一年後今場換上霍勵賢後上得第二，同「新力風」串成101倍冷Q，李嘉欣愛駒「一寶」跑第三，第四名係「恩格斯」，四重彩派廿四萬六千幾蚊。
今場三大高手全軍覆沒，「幸福指數」飛起韋達用雷神，結果熱倒跑第七，而洪金寶愛駒「崇山寶」今場初配潘頓久休復出仲大鑊，半程已經變軟腳蟹，半拉停大包尾過終點，輸超過15馬位，傷患紀錄纍纍之馬，前景再一次響起警號，至於韋達座騎「兵威振」唔好得幾多，十二駒中跑尾二。