肥嘟嘟嘅澳新銀行（ANZ）行政總裁（CEO）邵銘高（Mike Smith）離開滙豐，過檔ANZ，眨吓眼都有8年咁耐。ANZ最近宣佈，邵銘高今年12月拜拜，職位由財務總監Shayne Elliott接手。
上次Mike離任滙豐亞太區CEO一職，傳聞話同佢爭上位失敗有關，今次應該純屬企業換血，唔涉人事鬥爭，總結佢喺ANZ最大成就，肯定係將呢間澳洲土炮，憑住收購RBS亞洲業務，同埋入股兩間中國城商行──天津銀行與上海農村商業銀行，成為一間區域性銀行。Mike之後去邊？暫時未知，但佢今年59歲，相信仲有心有力。
佢以敢言見稱，例如試過鬧澳洲監管當局成日針對銀行，又試過將澳洲前財長Joe Hockey比喻為委內瑞拉獨裁者查維斯，批評分析員質素參差不齊，冇資格comment銀行！