改名冇耐嘅領展（823），近年買咗唔少海外物業，又同南豐合夥投得觀塘地興建寫字樓。領展主席蘇兆明最近接受公司內部刊物《823頻道》訪問時，形容九龍東將會發展到好似倫敦金絲雀碼頭（Canary Wharf）咁㗎。
領展上市時只做屋邨生意，十年來越做越高檔，最令人意外係年初走去投地，結果一擊即中。蘇兆明強調，佢哋「無變為發展商」，因為辦公室資產係領展長期投資，亦唔會好似發展商咁，賣出單位套利；蘇兆明預期，假以時日，九龍東作為新興核心商區，將發展成香港嘅金絲雀碼頭。
而領展返內地投資，買起「上海姑爺」羅康瑞喺上海嘅企業天地1、2期。蘇兆明就話，如果領展無視中國市場發展，將業務限於單一城市，會有好大風險喎。