「非法禁錮」是《普通法》罪行，根據第221章《刑事訴訟程序條例》第101I條，最高刑罰是監禁7年及罰款。所以CEO清楚明白那封非法禁錮律師信，根本冇case得啖笑。但既然送到上門擺在眼前，總不能不理，先召上司來問究竟發生甚麼事。上司完全不知有非法禁錮律師信這回事亦完全沒有聽新人提及過，只好馬上請那位當事人入來當面問清楚他究竟搞邊科。
新人話出律師信一事，確實有其父聽講過。事緣父母心痛寶貝仔晚晚開OT，他告訴父母有向上司爭取準時放工，但被上司以做完工作才能走刁難，所以被迫要OT。
寶貝仔受委屈父母怒不可遏，放工唔畀人走強行要人留低繼續做，擺明非法禁錮，叫阿仔馬上劈炮！寶貝仔不肯，因為其實都幾鍾意份工，只是對要晚晚OT這一樣非常不滿。父母有見及此，決定為寶貝仔出頭保障他的權益，絕不可以姑息上司欺凌員工任由公司無視法紀，說要聯絡律師跟進此事，沒想說時遲那時快，經已搞掂send埋過來。
事已至此，CEO問新人究竟想點，新人答其實很簡單，就是不OT！上司嘗試走出來打圓場做醜人，向新人解釋可能這個行業的工作不太適合他，因為要保證準時放工，根本不可能，企圖說服他另謀高就。
那新人不是省油的燈，即場向CEO投訴，是上司看他不順眼玩針對，甚麼工作都是臨時臨急交給他又遠都趕住要，否則他根本不需要OT，就不會搞到要出律師信來捍衞及奪回他的人身自由。
CEO說明白了他自會有安排，叫新人出去繼續做嘢。上司嬲到紮紮跳，質問CEO有冇搞錯咁都得？Well……新人返工未夠一個月，吩咐HR馬上處理就得！
即係點處理？大家話呢？
張慧敏
http://www.facebook.com/HKcareerdoctor