【《蘋果》專訪】現年37歲、前三級片女星林雅詩突然復出並自資六位數字推出寫真，不過隨即爆出12年婚姻瀕臨離婚邊緣，前日接受本報訪問時直認夫妻關係決裂，她說：「佢好忙，有時會夜晚12點先返屋企食飯，自己由囝囝懂性開始，會陪囝囝瞓同傾偈，同先生係少溝通。我拍寫真佢只係近日先知但冇過問，但係無論點都唔想影響下一代，假像又好點都好，想畀個仔happy family感覺，唔想佢知太多。」
新寫真唔露點
問到林雅詩會否擔心當寫真正式推出後，成為離婚的導火線？林雅詩說：「到呢一步我會接受，用盡我努力照顧小朋友。」接着她一度哽咽說：「呢個過程好艱難，好多離譜嘅說話，我試過忍唔住匿埋喺廁所爆喊，辛苦冇人知，有人話我身為阿媽，咁樣走出嚟為乜，講我唔緊要，唔好講我個仔，每個人背後都有唔同故事。身邊有啲人唔好講支持，連安慰都冇，反而係一啲好朋友鼓勵我。」不過林雅詩沒有氣餒：「啲人未睇就下定論，我係媽咪級出寫真，知自己影過乜，有底線，唔會見到三點。」
今時今日娛樂圈競爭激烈，𡃁模、媽模唔易做，羅霖是個成功例子，林雅詩說：「好靚、好叻、好欣賞羅霖，我係佢粉絲，佢出寫真我都有買，不斷睇番佢啲訪問，知道佢都係背後俾人話，聽佢講解要點克服自己，呢個時候要行番出嚟係好難，人哋會睇你咪行出嚟暴露，針唔拮到肉唔知痛。」
此外，昨日凌晨時份有人目睹林雅詩到急症室求診，其後向她了解，她在電話上說：「噚（前）晚半夜個人唔係好舒服，暈陀陀，唔小心跌親仲整到個傷口，所以即刻去睇醫生，打咗支針，食咗藥個人舒服咗啲。」她稱已告知老公。與此同時，她亦否認與棒球教練關係密切，她說：「身邊好多朋友都知道，呢個係我表哥，佢亦都係我嘅助手。」
採訪：卓寶花 攝影：陳慧安
