嚟緊區議會選舉，準備喺深水埗麗閣爭冧莊嘅民協馮檢基，選情危危乎。事關除咗有工聯會小花挑機打大佬，《東周刊》前副總編輯黃仲棋噚日亦宣佈，積極考慮出戰深水埗。雖則佢喺聲明中冇話明喺邊區落腳，但據知屬意喺麗閣打仗，皆因佢喺1994年同1999年，分別以民協及民主黨支旗喺呢區出選而贏咗，至2003年，佢因為假冒房署人員進入民建聯時任觀塘區議員郭必錚助理屋企偷拍，被判入獄緩刑而失去區議員資格，自此民協重奪呢區，馮檢基2003年後一直穩勝。
雖則黃仲棋正同區內泛民協調，但據知佢重奪麗閣意向堅定，阿基應該巧京京。傳佢組織緊地區關注組，準備明年立會九龍西直選。