浸會大學前任校長陳新滋嘅募捐能力，一直成為校內佳話，唔少校董會成員讚佢吸水力強勁；繼任人錢大康呢方面表現如何？八方相信校董會都唔使擔心咁多，事關5月獲校董會推薦為校長嘅錢大康，本月初履新後短短一個月都未夠就收到巨額捐款，腳頭唔錯喎。
耀才證券金融集團有限公司主席葉茂林早喺7月時，決定將該月憑短炒自家股票賺到嘅800萬，全數捐作支持大學發展，而浸大就被佢選中，噚日舉行捐贈典禮，錢大康同浸大校董會暨諮議會主席鄭恩基代為接收。據知葉茂林喺典禮上分享迎難而上奮鬥史時，一時感懷身世落淚，勉勵學生出身後都要回饋學校同社會。