3個月前宣佈辭職兼退出公民黨嘅民主思路召集人湯家驊今日起，唔再係立法會議員咯，噚日下晝佢以議員身份喺立法會舉行最後一個傳媒茶敍，自覺2004年至今嘅11年議員生涯，冇乜開心事，較欣慰嘅係佢任內成功推動《競爭法》同扭轉公民黨支持最低工資，遺憾嘅當然係未有爭取到普選啦，總結嚟講失多於得。
問到前黨友有冇送別佢？佢話郭榮鏗噚日有搵佢影相留念，梁家傑都有同佢打招呼，余若薇則送佢一幅「海內存知己，天涯若比鄰」字畫；雖則個黨冇為佢舉行正式歡送會，但佢話唔多介意。向來同傳媒關係唔錯嘅Ronny，特別向傳媒送贈印有佢英文名字頭嘅「R」、「T」同埋「Thank you」三款糖果say goodbye。
對有人𢱑公職感不安
無黨一身輕嘅Ronny，未來會專注搞好智庫民主思路，佢坦言對黃成智同狄志遠又用「第三條路」嘅牌頭成立「新思維」，仲𢱑公職做感到不安，話咁樣會令人覺得走第三條路係想獲一官半職，撈政治利益。