幾年前患上抑鬱症的薛凱琪（Fiona），透過祈禱找回內心的平靜，也希望可以發放正能量影響世界，可是Fiona心結未除，間中阿愁上身，腦袋就會重播以前不開心的經歷，不知喊濕了幾多個枕頭，幸好三個月前在台灣拍戲偶然認識了冥想，讓她找到內心的平靜，同時決心終身學習，做一個「可以被人愛」的可愛女人。
統籌：林妙萍
採訪及造型：顏英儀
攝影：郭賢興
化妝：Frances Ho of JessicaChan Makeup Workshop
髮型：Jo of Salon Queens Private i
薛凱琪剛於北京和台灣拍完戲，回到香港為了plug新歌，一日做八個電台訪問，另一日又做了三本雜誌訪問，每天工作都排得滿滿，讓她透不過氣於微博大叫「讓我的精神殺青了！」，難怪當下她最希望放大假，她說：「之前拍咗兩部戲，本來想11月去旅行休息吓，點知最近內地有一套合拍片想搵我拍，我考慮咗一陣就接咗，因為我覺得我有責任，我覺得自己好似一個老公，要養老婆、仔女、對公司、對同事、爸爸媽媽，到12月又輪到頒獎禮，要練歌，我真係好想放一個長假，去旅行relax。」
患抑鬱瞓醒就喊
工作縱使再忙，Fiona也會樂觀面對，「我覺得人生好好玩，幾乎每幾個月個天就會安排我好多轉捩點，我三、四個月就會變，趨向越變越好，我覺得神安排我做歌手係有一個使命，所以唱嘅歌都想正面啲，想感染fans正面啲。」
雖然Fiona花了不少力氣用積極去面對人生，更想改變世界，可是曾經患上抑鬱症的她心結仍未解開，更自爆一個月總會有幾天無緣無故會變了《玩轉腦朋友》的阿愁上身，「去台灣拍戲前，我一個月總會有幾天無緣無故一瞓醒就喊，諗番起以前唔開心嘅事，諗諗吓仲會喊，加上身體又有好多小毛病，三個月前去台灣拍戲，有人介紹咗氣功師傅同我醫病，又學識埋冥想，我知道好多人會覺得基督徒唔應該信氣功或者冥想，但我覺得我同神嘅relationship唔同，冥想令我學識peaceful，雖然情緒仍然有波動，但呢三個月我冇再瞓醒就喊，個人正面咗，我形容嗰啲負面情緒就好似癌細胞咁，我唔會再畀佢哋再擴大。」
「我好期待Mr. Right」
相信好多人都會覺得Fiona外表可愛甜美，不過她就嫌自己唔夠「可愛」，她說：「可愛唔係指cutie嗰種，我指嘅『可愛』係要學做一個可以被人愛嘅人，我覺得首先唔好要求人哋愛你先，要做一個可以被人愛嘅人，不過我都係人，始終有情緒，都會有乞人憎嘅時候，我覺得學習『可愛』係我未來人生一路要學習嘅事，唔好妒忌人哋有人愛，首先要知道點解人哋有值得愛嘅quality，呢個都係我新歌《那一個我》嘅一句歌詞，『明天我要做一個更可愛的我』，之前經歷過好多愛情，一個一個都唔成功，但都係我人生必經階段，如果唔經歷過，就算個天一早畀我遇到Mr. Right，我都唔識點對待呢段愛情，我覺得好grateful，之前嘅愛情都唔workout，因為每一段都令我準備好去迎接啱嘅愛情。」
在過去的電影中，Fiona的愛情生活如魚得水，過得甜蜜蜜，她說：「之前去北京同台灣都係拍輕鬆愛情片，下個月中去內地又係拍愛情片，我好享受每次拍戲談戀愛嘅過程。」回到現實，Fiona卻仍未找到Mr. Right，「好彩我信神，知道神會幫我安排最好，所以我都好期待我嘅Mr. Right，做訪問被問過一千次想唔想結婚、生仔，但我真係唔急，所有嘢都可以安排，惟獨愛情、結婚同生仔冇得安排，一切順其自然。」
童顏靠愛情滋潤
薛凱琪雖然已經34歲，不過仍keep到童顏，望落還似20多歲的少女，問到她如何保持童顏的秘訣，Fiona說：「我遺傳咗媽咪皮膚好，加上我就算點瘦塊面都有肉，面形上闊下窄，望落去都會細個啲，不過女仔除咗化妝之外，心境開心個樣都會差好遠，之前我唔開心，嗰排做極facial做乜機都冇用，女仔心情好，個樣幾殘都會靚，所以一定要笑多啲，個腦會釋放好嘅chemical，人都會靚啲！不過我覺得女仔有愛情滋潤，會特別有光彩，愛情能醫百病，不過都唔可以當佢係補品！」
更多精采時尚內容，盡在 http://add.appledaily.com 。