今季仲未有季內打叠兩win或者再贏的馬，呢個魔咒幾時會破呢？你問我，我問邊個？反而跑第二後再出補中嘅馬，近三戰都有出現喎！包括「火龍寶」、「上浦猛將」等駒，似乎呢類馬更值得追捧。
今期(10月1日)賽事中，上仗於季內跑第二嘅馬共有五匹，包括「真慷慨」、「駕悅」、「酣睡密碼」、「同個夢想」同埋「和順超影」，邊隻可以補中，跑完先有答案；但講到決心，「真慷慨」應該係較大一匹，因為啱啱先響本周一跑第二，休息兩日又跑過，擺明想打鐵趁熱，由潘頓換咗郭能，一樣係好騎師，睇吓係咪好似「爆炸糖」、「鴻圖戰士」咁，打叠跑即win。
其餘四件中，介紹「和順超影」，今季轉入方廐，比上手馬房進步咗，上次輸俾「美麗大師」小小咋，今場跑本地三級賽慶典盃，只孭114磅，睇吓灰色神獸能否返嚟嘞！