廣州恒大噚晚喺亞冠盃四強首回合主場對大阪飛腳，出齊荷西保連奴、列卡度高拉特同艾傑臣三位巴西外援，一開波就壓住飛腳狂攻，點知初段輸反擊；12分鐘飛腳右路傳中，中鋒安達臣柏德列身位夠，接應唔到都逼到恒大中堅馮瀟霆擺烏龍。落後嘅恒大繼續攻，半場已經有13次攻門，35分鐘終於追平。艾傑臣返後攞波，突然放個過頭波入禁區，入楔嘅黃博文第一時間順勢窩利抽射，為恒大半場扳平1:1。
首回合2:1反勝飛腳
換邊後，艾傑臣喺57分鐘送多球助攻，佢走到左路傳中，隊長鄭智好似飛將軍咁衝頂入網，幫恒大反勝2:1。至於另一場四強首回合，希拉爾禮拜二喺主場同阿爾阿里踢成1:1。