「新界王」劉皇發自從「讓位」畀囝囝劉業強做鄉議局主席之後，局內都有唔少是是非非，一時話佢同副主席張學明面左左，一時話佢鎮唔住一班叔父輩嘅「鄉頭」云云，之前屏山鄉委會主席曾樹和，仲喺執委會會議上公開話要考佢牌，睇吓發仔點處理僭建問題喎。但有人提醒花生友，除咗僭建外，發仔查實仲有另一個牌要考，而且難度更高，就係去車公度求籤喇。
近年嘅大年初二，劉皇發都會以鄉議局主席身份去到車公廟為香港求籤，無論信唔信都好，唔少港人都好關注呢個傳統活動，睇吓嗰年係咪要自求多福。而發叔過往都會喺求籤後，喺鏡頭前向公眾解吓籤。
搖兩搖個籤筒，睇落好簡單，但難度其實係在於，事後點樣解籤？皆因要有好高嘅政治智慧，先至解到聽落言之有理，要畀外界將之同時下社會問題掛鈎時，又唔可以去到太盡，點樣拿揑都好考功力，難怪沙田鄉委會主席莫錦貴，據知早前已經問定發仔，明年係咪會負責求籤㗎？可能係想佢趁早溫吓書，例如搵廟祝惡補一下先隆重登場。
講開車公廟求籤，去年新民黨主席葉劉淑儀俾麒麟撞飛一幕，花生指數高企，有鄉議局中人講起呢排出席活動，成日都見到葉太嘅倩影，同場都會有埋劉業強。查實今、明兩年係選舉年，新界人都手握唔少票，同新任主席打交道是常識吧。
花生友
周二、四刊出