國慶日賽事重頭戲之一，當然包括第九場1400米三級賽慶典盃，練馬師高伯新派出「誰可拼」及「大印銀紙」雙龍出海，其中「誰可拼」過往曾交由潘頓策騎一次，相隔足足十八個月人馬再度合作，潘頓顯得好興奮，佢話最近曾策「誰可拼」試草地大閘，當日牠的表現甚佳，出閘迅速，沿途走勢強勁，只需要輕微催策，已經突圍透出，加速反應一流，所以接近終點時，可以放鬆韁繩，慳番啲氣力留待比賽先用。
潘頓並回憶指出，十八個月前策「誰可拼」上陣，當時還隸屬姚本輝麾下，結果力拼下屈居亞軍，佢話顯而易見，現時的「誰可拼」遠比嗰陣成熟進步，變得收放自如，實力有目共睹，只要一切正常，足以喺頂級賽事與任何對手周旋。
至於高伯新就表示，潘頓是香港最優秀的騎師之一，對他當然有信心，而「誰可拼」歷來14戰1400米得2冠4亞4季，上名率超過7成，而且今次排得一檔，亦有利這匹均速馬。至於「誰可拼」的心腹大患，高伯新笑言是自己人，富豪潘蘇通的愛駒「大印銀紙」，佢指這匹灰馬9月中喺廣東讓賽盃只跑第六，無疑令他稍為失望，但該仗係馬兒季內初出，太過搶口，不能作準，熱身一仗後躁火下降，今仗會有截然不同演出喎！