新民黨參選團隊噚日舉行區議會誓師大會。香港政界一向陽氣盛，女政客本來就唔多，「美女刺客」更加少之又少，所以該黨出戰大坑嘅29歲靚女兼劍橋高材生王政芝Gigi就十分吸睛，政圈有人話佢似梁詠琪，佢笑笑口話冇聽過喎。
大肚婆都參選
大坑現任區議員係前AO黃楚峰，但黃楚峰想退居幕後做多啲黨務，新一屆希望Gigi接棒，呢位「美女刺客」話會關注該區交通問題。
噚日另一個「焦點」相信係出選沙田顯嘉嘅林松茵，皆因佢大住肚都參選，夠晒博，笑言希望選民唔介意「買一送一」喎。
講新民黨嘅女士點可以唔提主席葉劉淑儀？噚日氣溫30幾度，頂住大太陽喺荃灣誓師，個個汗流浹背，但佢卻以鮮紅長袖外套配領巾登場，話咁着撞色，影相會靚啲，熱都冇計喎。