投資市場對乳業股向來有戒心，驚忽然會再爆出毒奶醜聞。輝山乳業（6863）7月起豪拋16.8億元回購股份，以加強市場信心，好不容易將股價推上去。點知河北藥監局上周話，輝山旗下產品有毒物超標，搞到股份停牌，睇怕之後都凶多吉少。輝山乳業開記者招待會反擊，話河北省嘅檢測唔規範，要討回公道。
諷刺嘅係，今次揭發事件的河北藥監局，正是在2008年三鹿毒奶事件中被指監管不力，縱容當地奶企造假。內地有評論話，三鹿事件後，河北奶業大受打擊，輝山乳業來自東北，所以河北藥監局要大力打擊。而輝山乳業所在的遼寧省，當地藥監局就話，輝山乳業產品冇問題。
不過，如果一個國家嘅食品安全檢查咁兒戲，輕易就可以用來做地方企業保護傘，成個檢測系統公信力更加冇人相信。無論輝山乳業是否有出售毒奶，受打擊的，其實又再是整個中國乳業。
黃尹華