啱啱喺上月底同數碼通（315）拜拜嘅前總裁黎大鈞，原來連續3年被減人工！根據數碼通最新年報，黎大鈞2015年度（截至今年6月底止）嘅年薪係1,954萬元，較上年度減少23%，當中主要因為完全冇咗股份報酬呢部份，不過扣除股份報酬，淨計現金與退休金，佢份糧依然少咗15%。
翻閱近幾年年報，原來黎大鈞自2012年度獲加薪之後，連續3年都被減人工，計埋股份報酬，黎大鈞2013與2014年度分別被減薪9.5%同19%，不過嗰兩年數碼通嘅盈利都係倒退嘅，似乎係按表現決定薪酬水平。
之但係，數碼通舊年盈利增長74%，黎大鈞都要減薪，就認真陰功豬。不過唔緊要喇，可能黎大鈞搵到更靚嘅碼頭，遲吓搵到更多錢都唔定。