是咁的，「香港高登討論區」創辦嘅月刊《巴絲打》，噚日正式出版。新書上市，未必一定可喜可賀，不過一班高登嘅「巴絲打」就喺網上討論區狂踩本書嘅封面「小學雞」，話驚買雜誌會俾人恥笑，留下一地「負評」。雖然俾人狂罵，但係高登行政總裁、方丈林祖舜就冇小器，仲話「高登」巴打一向以敢言出名，歡迎「巴絲打」有咩照直講喎！
方丈之前講過，希望將討論區嘅話題推上雜誌，由此孕育嘅《巴絲打》創刊號以「小丑神」、加埋林祖舜舉黑傘嘅相做封面。呢個「搶眼」設計立即惹來網民嘅陣陣恥笑，批評係「小朋友Design」，有人仲話內頁顏色死氣沉沉，「點都突唔到圍呀！」另外，有網民將《巴絲打》同另一本年輕人雜誌《100毛》對比，狂踩《巴絲打》勁差，請搞手林祖舜快啲「Stop la」㖭！
方丈任鬧唔小器
俾高登仔咁鬧法，睇怕《巴絲打》銷量都唔慌好。八方噚日搵咗好耐，先搵到位「CD-ROM」歐陽先生買書，但捧場嘅佢竟然話對本雜誌無任何期待，揭完書之後，仲話只係對一田百貨CEO莊偉忠嘅訪問有興趣。就《巴絲打》嘅一地負評，林祖舜噚日同八方講，雜誌仲喺初創階段，有好多嘢要改，佢又覺得高登討論區以敢言出名，本書「有人罵即係有人理啦」，希望「巴絲打」畀多啲意見佢改進喎。
創刊號有乜嘢睇
1.介紹高登係乜︰深入淺出熟讀高登重點
2.教改造劣食︰名廚的雞翼魚蛋湯食譜
3.教毒男扮靚︰脫毒工程一期
4.名人專訪︰林祖舜訪問一田百貨CEO莊偉忠
5.專員試食︰試食高登仔開嘅日式火鍋餐廳
李八方
mailto:[email protected]