傘運咁就過咗一年，喺佔旺區戴頭盔又攞盾牌嘅「美國隊長」Andy喺呢一年未停過街頭抗爭，八方就收到料，原名容偉業、做救生員嘅佢噚日朝早又出動。有市民影低咗Andy喺荔枝角港鐵站外行人路，不斷咁揈住好大幅嘅港英旗，引來唔少上班族眼望望，睇吓佢搞邊科！
八方之後搵到「美國隊長」，佢話今次出動係要向長沙灣廣場「挑機」。事緣商場喺中秋時，放咗啲解放軍公仔同掛咗五星紅旗，Andy覺得咁樣係政治舉動，好唔應該囉！至於點解唔踩入商場，Andy解釋係為途人安全着想，所以揀喺對面行人路「閃揈」一陣。八方之後去商場走咗轉，啲解放軍公仔已經散晒水，但天花仲有好多幅五星紅旗「壓頂」！