曾幾何時八方都係電視迷，尤其鍾意睇卡通片，更欣賞配音員出色嘅聲演，噚日一班粵語配音員就宣佈成立首個香港配音從業員工會。工會主席黃志明大有來頭㗎，佢配過卡通片《男兒當入樽》嘅赤木剛憲同電視劇《三國演義》嘅曹操，性格演員徐錦江演出嘅電影角色好多都係由佢配音。
明哥同八方講，𠵱家工會有近60名會員，唔止配音，佢希望撰稿員同外語繙譯員都加入工會。明哥入行近30年，見證行業興衰，佢慨嘆過去十幾年，配音員待遇有跌冇升，多番爭取下，最近有線電視先承諾10月起調高配音製作費，令配音員有人工加，佢希望團結業界力量，爭取合理待遇。