上星期終審法院新大樓搞咗個啟用禮，但噚日先係新大樓第一日審案嘅大日子，開張大吉就審一單億元爭產案，代表上訴人同答辯人嘅分別係資深大律師馮柏棟，同前律政司司長、同樣係資深大律師嘅黃仁龍。一開庭，首先發言嘅馮大狀已經形容呢個係歷史性時刻，發生喺一個具歷史價值嘅建築物入面，黃大狀亦話呢度係香港法治象徵。首席法官馬道立聽到佢哋咁講就笑笑口，散庭嗰陣都形容今日係歷史性一日。
散庭時八方捉住黃大狀吹兩句，佢對新終院讚不絕口，連講幾次「好好」，又話勝在夠大，庭內聽法官同其他大狀講嘢都好清楚，令市民更理解法律制度。除咗大狀，八方仲見到港大法律學院首席講師張達明帶埋仔仔嚟旁聽，唔知仔仔係咪都想做律師，嚟偷師呢？