學運界又有人行桃花運喇！學民思潮發言人黃子悅噚日喺社交網以一句「我好愛你」，公佈同學民前發言人劉貳龍戀情，佢話自己無論開心或難過，對方都係佢「第一個想起的人想擁抱的人」。
黃子悅po出二人溫馨合照之餘仲發表愛的宣言。佢話自己雖為發言人，其實不善辭令、唔識表達自己，而男主角就係可以令佢放心同輕鬆嘅人。由於要參與學運，女主角承認自己時間少，有時就算約到男友都無法快樂地玩，但對方總無比體諒。黃子悅仲剖白，當男友向佢表白時佢有多高興！最後佢仲表明心迹話，「我會牽着你的手，一起走下去，正如當初你走向我，向我伸出手那樣」，真係甜到核爆，除咗恭喜之外，八方都唔知講咩好喇。