有啲人情場失意，事業就會得意，但俄羅斯美女網球手舒拉寶娃就衰晒兩瓣。喺兩個月前同賤男狄美托夫分手嘅舒娃，日前喺中國舉行嘅武漢網球公開賽傷癒復出，點知整親左手而被迫退出比賽，可能錯過下月25號喺新加坡舉行嘅WTA年終賽。
左手受傷退出武漢賽
28歲嘅舒娃今年黑到爆，除咗大滿貫賽事食白果同埋周身傷之外，仲俾男人呃，最終同背住佢偷食嘅保加利亞網球手狄美托夫分手。七月頭佢喺溫網女單四強輸畀細威，之後因腿傷關係玩唔到美網，頭尾休息咗近三個月冇打過任何比賽，周一復出玩武漢公開賽，同捷克球手史達歌娃進行第二圈賽事。點知佢繼續行衰運，打到第三盤領先2:1時，因為隻左手太痛，於是決定退出，連下星期嘅北京網賽都應該參加唔到。
賽後佢話：「我左手前臂好痛，而且仲越嚟越痛。我有幾個月冇比賽，可能因為咁先搞到受傷。」而上屆亞軍寶查周一亦因腦震盪退賽。
舒娃家陣又傷，連佢都唔知道自己趕唔趕得切參加下月尾嘅WTA年終賽，同埋11月對捷克嘅聯會盃決賽。佢仲話：「年終賽同埋聯會盃係我首要目標，我會用盡一切方法令自己快啲好番。但老實講，我真係唔知要休息幾耐先可以好得番，所以真係唔知下個禮拜嘅比賽仲可唔可以參加得到。」講番呢個武漢公開賽，大威、積歌域同埋伊娃諾域等著名球手都喺首圈贏波出線。