老老實實，隨着埋身抽水的人越來越多，也許深水埗明哥真的需要一個經理人團隊了。
自從數年前派飯派到街知巷聞，被傳媒爭相報道，明哥已成為民間英雄。仲要有浸會學生唔識世界，搞學生會活動要明哥贊助，結果被網民狂轟，最後要拉大隊到明哥舖頭請罪才可息事寧人。此事連電視台新聞都有追蹤，經此一役，明哥的品牌價值，穩步上升。唔止㗎，其實仲有政治低B的政府福利專員、地區專員話派飯會鼓勵更多人露宿，被明哥鬧鬼，話佢哋應該say sorry，網民拍掌叫好，芝麻綠豆地方官瞬間收聲，明哥政治能量隱隱浮現。
還記得紙熊貓嗎？這千多隻「勢利無比」的紙熊貓，行遍香港名勝景點之餘，不忘走訪各大傳媒編輯部，冧到各大傳媒大篇幅又報道多一次；熊貓兵團集盡明星名人郵以外，也沒遺忘到明哥的舖頭打卡，這一張相在網絡瘋傳，Mary視之為神來之「抽」。
但人怕出名豬怕肥呀，明哥！以你有正冇負的民望，成為各大政治勢力、各大品牌的爭奪對象乃是常態，昨日就聽聞你會同千福BB合作，游說美國財團捐錢搞南亞裔難民飯堂，哎呀，百幾二百萬啫，我寧願你向網民公開集資喇，公然同外國勢力合作，雖然話搞公益，始終染上政治色彩，何必給人口實，千福BB又係嘅，你有超級大國為後盾，點做公關show都得啦，千祈唔好累到我哋阿明哥至好！
唉，建立了品牌，就會有人飛身撲上，下次習總訪港隨時來探你舖頭呀，左中右，紅藍綠，你管得幾多，快啲搵個德高望重的義務經理人啦，成立埋基金仲好，定好晒捐助宗旨，一勞永逸。係冇？
彭瑪莉
mailto:[email protected]