郭基煇參與嘅35公里挑戰賽，少啲操練都唔得，主辦單位旅發局好細心，特別安排「總裁慈善單車遊」，啱晒平時冇操開又想參與嘅名人試吓。賽事早35公里挑戰賽一日舉行，旅發局會喺10月10日晚7點嘅尖沙嘴梳士巴利道同麼地道，設置約2.3公里長嘅賽道，只要繞兩個圈就達標。八方聽聞參加者有新地主席兼董事總經理郭炳聯，亦有商務及經濟發展局局長蘇錦樑。富二代都好十卜，華人置業主席兼行政總裁劉鳴煒同東亞銀行執行董事兼副行政總裁李民斌等都會露兩手。