【本報訊】本港零售市道疲弱，內地旅客人數持續減少，零售商對今年十．一黃金周已普遍「冇期望」。商家指，黃金周效應近年已今非昔比，就算生意較平日「好少少」，但相信無助扭轉近月零售市道的跌勢。
六福：冇乜期望
六福主席兼行政總裁黃偉常看淡黃金周銷情，坦言對此檔期已「冇乜期望」：「幾年前黃金周真係好勁，生意閒閒哋可升兩、三倍，但近幾年黃金周早已褪色，所以都唔會特別做啲乜嘢，亦冇乜目標。」黃偉常表示，上月金價稍有回落，曾一度刺激公司黃金首飾的銷情，但近期金價已回升，有關效應亦不復存在。
莎莎首席財務總監陸楷表示，公司在十．一黃金周雖有推廣活動催谷生意，但他認為黃金周對全年收入的影響早已不如過去般有重大意義，故今年亦不太看重。
太子珠寶鐘錶主席鄧鉅明則表示，早前暑假旺季銷情明顯較去年差，期望十．一黃金周有助帶旺生意：「希望比暑假好啲。」他又指，今次黃金周假期總共有7天，相比以往長，料巿況反應正面。
■記者江靖然