等待永遠係最痛苦，費倫天拿等重返榜首一日就等足16年！周日意甲榜首大戰，費倫作客以4:1大勝國際米蘭，自1999年二月後再登聯賽第一。睇番費倫16年前嘅陣容，有巴迪斯圖達同雷哥斯達呢對最佳柏檔，加埋意大利門神托度、巴西前鋒「野獸」艾蒙度等，真係令人懷念！可惜費倫喺98/99球季最後只得第三。
講番場波，費倫頭23分鐘已經以三球領先，下半場克羅地亞前鋒卡連歷（白衫）再入一球，成功完成帽子戲法，最後大數對手四個一皮。賽後主帥保羅蘇沙就話費倫絕對有能力衝冠：「今季好多球隊都大力投資爭冠，但我哋絕對唔會退縮，球隊有能力擊敗任何對手。」而落敗嘅國米就終止五連勝，令四大聯賽得番德甲拜仁慕尼黑一隊係全勝之師。