大前晚約11點，港鐵發現觀塘站近apm出口有個後生仔攞住結他自彈自唱，即時派員驅趕，過程畀網民影低，前晚開始喺網上瘋傳，截至噚日下晝，點擊已經有70幾萬，過萬人轉載。片中可見個後生仔畀港鐵職員驅趕時講咗句：「根據地契顯示，呢個位置唔係屬於港鐵，你可以話我噪音、阻街叫我走，但唔可以話我佔用港鐵範圍。」一句就K.O.咗個職員。
馮仁昭噚日搵到呢位後生仔接受訪問，原來佢就係今年24歲、上年喺《中國好聲音3》香港區海選攞到總冠軍，仲去過上海參加盲選嘅獨立歌手劉卓軒（Hinry）。Hinry話：「我覺得佢哋（港鐵職員）可以改善吓態度，我唔係特登要講自己係測量師，因為我都啱啱辭咗職全力做音樂，我只係想畀佢知，我真係了解過。」
Hinry話當晚港鐵職員有報警，兩名警員之後到咗，但係冇即時阻止佢唱歌，只係企喺一邊觀察，之後勸喻佢離開：「警員係好有禮貌嘅，我最後都離開咗。」問Hinry會唔會再去？佢就話：「我諗短期內唔會，因為唔想俾人覺得係博出位。」
秋生fb鬧爆
黃秋生就喺fb鬧港鐵職員做家丁，仲留言話：「大家睇吓條新聞片就知道𠵱家港鐵啲家丁幾咁乞人憎，從幾時開始港鐵可以管埋官地……我建議佢下次再有機會不如咁講，好嘞！唔好搭港鐵嘞！家丁真係硬交交。」
撰文：馮仁昭
