香港桌壇「四眼妹」吳安儀今年威到盡，除咗成為雙料世界冠軍，周日喺全英錦標賽決賽再下一城，以5:1擊敗世界一姐伊雲絲，成功衞冕。賽後呢位桌球小天后未有得唞，留喺英國約戰男子職業球手，準備11月爭奪今年第三項世界冠軍頭銜。
全英賽上周六起喺列斯展開，安儀首日喺分組賽三戰全勝，同隊友葉蘊妍、溫家琪分途晉級淘汰賽。呢位應屆世界冠軍周日喺八強掃走葉蘊妍，晉級四強後繼續保持勇態，打出一桿99度，輕鬆以4:0掃走拉脫維亞對手。殺入決賽後，安儀雖然遇上10屆世界冠軍、英國嘅老對手伊雲絲，但開局未有受到太大考驗，輕鬆領先2:0，之後一度被追成2:1，但表現冷靜嘅安儀再連取三局，以5:1大勝；隊友溫家琪就奪得季軍。
留英兩周備戰世界賽
24歲嘅安儀四月贏得首個職業世界冠軍，其中四強就係贏伊雲絲晉級，上個月佢再奪六個紅球世界冠軍。今次再度捧盃，呢位四眼妹賽後鬼咁興奮，拎住獎盃又錫又叫：「贏比賽當然開心，但最緊要係識得放鬆自己，嚟緊我會留喺英國兩星期，同當地男子職業球手訓練，備戰11月嘅業餘世界賽。」
