新民黨主席葉劉淑儀真係可謂花生友嘅最愛，永遠都有無限嘅話題，畀政界中人茶餘飯後熱議。仲講緊葉劉晒大腸照晒出個大頭佛？Out晒啦，最新鮮滾熱辣梗係佢話自己唔係一條跑道，唔應該俾人作為政途上嘅起跑點，借此暗寸佢嘅前愛將、啱啱升呢做政制及內地事務局副局長陳岳鵬，當初親近佢疑似係要為入政府鋪路。
葉劉自比飛機場，政圈中人無不話佢呢個比喻好啜核；邊架飛機有興趣喺佢跑道上「起飛」？真係令人想入非非。但查實政圈中人笑笑口之餘，都戥陳岳鵬陰功豬，皆因有時際遇呢啲嘢，可遇不可求，相信陳岳鵬都未必預計到；而個黨多咗個副局長，都係「榮譽」吖，點解葉劉仲嬲嬲豬呢？
有得升引人從政
花生友唔係葉劉身體裏嗰條腸，唔知道佢為何永遠放不低，但聽聞呢次陳岳鵬升呢，對唔少人嚟講都係好事，坊間盛傳，有人向政制及內地事務局推薦過，建制派最大黨嘅某黨員接任副局長，而若然呢個人接任，肯定惹嚟議論紛紛，反彈極大；據知獲推薦嘅人選，唔只得一個㖭，點解揀唔落手㗎呢？花生友點知呀。但從陳岳鵬最終獲任，相信該局認定呢個係最好嘅人選安排。雖則有人批評，岳鵬太年輕嘞，勝任此職咩？但明明政治問責制係講緊旋轉門嘛，梁班子內唔少人話，如果冇一個例子係有得升，點吸引其他人從政？
花生友
周二、四刊出