講起生在香港，活在香港幾幸福，皆因睇到敍利亞難民湧往歐洲之故，以心比心，以香港人比敍利亞人，或與1975年以後越南船民比較，香港人確係幾幸福，即使在1949至1962年間，大量同胞翻山越嶺逃離大陸來港，嚟到之後就有同鄉照顧，有教會派美國牛奶，港英殖民地政府興建徙置區安置，來港難民嘅際遇都好過敍利亞與越南船民好多。
二十年前有一位紡織公司上市創辦人大老闆請傳媒去南丫島食海鮮，講公司發達史，回程時已經係夜幕低垂，海上視野不清，船頭燈光照在海上，見到一啲廢物浮沉，有一件類似膠波形狀，老闆突有感而發：「六幾年某夜，我就係在呢度附近，攬住個籃球浮沉海上，拚命游往岸邊，好彩游到上岸，有同鄉接應接濟，後來攞到身份證入紡織廠做工人。當時點會想得到三十年後我會坐遊艇請你地班傳媒大哥食飯吖！」呢啲由老虎岩（今樂富）搬上僑福道（借用陶傑之言）嘅故事，香港不知有幾多。今天祖國同胞不用再逃亡，值得慶幸。但昔年廣東人逃來香港，與敍利亞人逃往歐洲，係截然不同之兩回事，不同文不同種不同宗教嘅人監硬要住埋一齊，遲早必有衝突，人情感情與理智必然產生矛盾，故此老友記王弼去完土耳其歐洲回來之後，對歐洲前景即刻削低評分。王弼話佢啲德國朋友好驚難民定居德國之後，最好嘅一批（知識專業人士）會被大公司企業吸納，中間一批可入工廠填補勞工短缺，但留下最大而知識技能比較差嘅一批，就會伸手拿福利，唔打工，仲會閂埋門講伊斯蘭教，與德國主流生活脫節，唔好彩嘅話，還有IS分子滲入，而所有費用由德國納稅人埋單，到時長貧難顧，賴死唔走，必成社會計時炸彈。講到呢一點咁現實，德國知識分子無論平時點樣講道德、人權，都為之皺晒眉頭。敍利亞人已經係伊斯蘭教信徒之中，比較世俗化嘅一派，並非狂熱一族，但伊斯蘭一些行為與法律，確實係與西方世界格格不入嘅，最近共和黨一位競逐總統候選人嘅Ben Carson醫生，為人謙遜，性格溫和，講說話不提高聲音，被問到伊斯蘭教徒可否做美國總統，加遜醫生話，不可以，因為伊斯蘭教義與美國憲法精神有抵觸，立即招來自由派一片抨擊之聲，話佢歧視伊斯蘭。大部份美國國民會點諗？相信心裏多數贊同加遜醫生之言，但唔敢講出口啫！