六日內應付五場硬仗，港籃噚日終於頂唔住，喺亞錦賽12強面對印度，末段氣力不繼下以71:76反勝為敗。噚日踏入26歲嘅中鋒惠龍兒（Duncan）雖然唔可以贏波開心過生日，但賽後都獲隊友送上蛋糕，仲許下願望，希望今日對戰日本可以重拾應有水準。
肥煒21分 李琪遭零封
亞錦賽噚日繼續喺中國長沙上演12強賽事，身處E組嘅港籃周日面對伊朗大敗，噚日轉戰實力相近嘅印度，可惜都係贏唔到。港籃第一節領先19:14，但之後對方大前鋒艾姆約大爆發，單節狂轟18分，港籃半場只領先39:34。面對印度班高人，港籃第三節力保優勢，仍然領先56:53，可惜第四節體力急速下降，最終以71:76輸波，大師兄黃鎮煒就取得全隊最高嘅21分，更射入三個三分波。
港籃目前喺12強E組四戰全敗，射手李琪今仗更慘被零封，賽後佢自責咁話：「今（噚）日係Duncan生日，自己體力不足下發揮唔好，唔可以用勝仗送份生日禮物畀佢。」球隊賽後收拾心情，為26歲生日嘅Duncan送上蛋糕，全隊職球員慶祝時終於笑番。
不過，排榜尾嘅港籃已肯定出局，但轉戰9至12名次賽前，今日12強壓軸戰就會硬撼日本；日本有打過NBA太陽隊嘅田臥勇太領軍，不過內線嘅太田敦次同竹內讓次都只係6呎9，唔算太「恐怖」。壽星仔Duncan話：「今場阿琪被盯死，我哋內線球員尾段心急下又失咗唔少籃板，但寶貴經驗都算係一份難得嘅生日禮物。比較對上幾仗嘅對手，日本整體實力唔算好強，但幾個射手又快又準，我哋會加強防守，希望製造多啲機會，畀阿琪同幾位外線球員得分。」
菲律賓破伊朗不敗身
同日，E組上演上屆冠、亞軍大戰，衞冕嘅伊朗半場領先43:37，但之後被菲律賓嘅前NBA球員布拉治同後衞威廉內外夾擊，最終輸73:87，雖然被打破不敗身，但就以得失球差保住榜首，今日伊朗會轉戰巴勒斯坦。而主場嘅中國就以90:72擊敗黎巴嫩，喺F組保持四戰全勝，今日壓軸一戰鬥卡塔爾。（有62及202台今日7:30pm直播）
