政黨要發展，梗係要吸新血；就算未入黨，都可以結盟。八方發現，近期新民黨主席葉劉淑儀出席嘅活動，都有位新面孔在席，似乎幾受重用，但據聞呢位女子並唔係新民黨黨員。講咗咁耐，係時候揭開謎底，八方講緊嘅葉劉新愛將，查實係身兼香港青年專業聯盟召集人嘅大律師容海恩Eunice（圖）。
翻查資料可見，早喺今年7月中，由葉劉創立嘅匯賢智庫舉辦嘅安老服務的發展與挑戰研討會，容海恩獲委以重任擔正做主持；9月中葉劉喺facebook貼相，匯報同懲教事務職員協會嘅執委晚宴，討論紀律部隊工作嘅挑戰等，Eunice亦係座上客。至日前葉劉再po相，話同海關官員協會嘅執委晚宴，Eunice繼續有份喎。
八方八過，據知Eunice畢業於城大法律系，40歲都未夠，唔少建制派封佢做「法律界桂綸鎂」；識得玩樂器之餘，仲唱得兩嘴㗎喎。