雨傘運動昨日一周年，去年黃耀明和何韻詩為該運動組成「文化界監察暴力行動組」（文化監暴），他們昨日到了金鐘出席全民反政治打壓集會，同場還有去年撐佔中的男神王宗堯和人民力量主席袁彌明，與現場集會人士一齊響應。
阿詩和明哥拿着紙牌上台分享感受，阿詩說：「今日見番好多摯友同巿民，好感動，前面可以點行真係唔知，孤單唔緊要，我會繼續陪住你哋。」明哥指雨傘運動雖仍未能真正爭取得到普選，他說：「但從此香港人唔再一樣，呢個好緊要，對香港睇法分得好清楚。」
阿詩認為爭取未必可即時生效：「呢件事喺香港歷史係抹唔去，是非黑白。公義嘅路好長，公眾人物係有責任堅持發聲，用我嘅能力去影響其他人，年輕一輩已經唔同咗，從細微事做起，只不過巿民都要回氣，抗爭都會攰，喺日常生活中守住香港嘅價值。」問阿詩和明哥過去一年的影響，明哥笑阿詩應收拾好心情，他又自嘲年紀大回氣需時：「我有唔同感覺，個樣都唔同咗，但種子已喺身體中。」
王宗堯怕再有衝突
王宗堯昨日放下工作站出來，心情複雜的他說：「去年時我拍緊《選戰》，當時想即刻趕過去。」對於巿民昨出來參加集會，他續說：「身為香港人，為權利做啲嘢，最重要係覺醒。」對於人民力量揚言超過一千人支持便衝出夏慤道，佔據兩條行車線87分鐘，紀念警方去年施放87枚催淚彈，王宗堯說：「希望集會係和平，希望大家唔好太挑釁警方，我怕會發生舊年嘅衝突。」
此外，昨日35歲牛一的袁彌明也穿上黃傘圖案tee現身，她說：「唔鍾意叫一周年，民主運動係未完，我哋會用唔同形式去公民抗命，年輕人要出力，我哋記住去年今日87枚催淚彈，香港係有希望嘅。」
採訪：盧妹
攝影：陳俊強