踩單車原來唔止可以強身健體，仲可以踩出人生道理！新鴻基地產執行董事郭基煇Adam因為參加由香港旅發局主辦嘅香港單車節35公里挑戰賽，近3個月特別搵咗港隊前單車代表梁志賢加操；科學園附近、欣澳去迪士尼及東涌，以至上上落落有啲危險嘅青山公路同深井，不難見到Adam破風影蹤，佢話踩車令佢領略到：忘記背後，努力向前，向着標竿直跑！
挑戰35公里賽事
10月10日同11日舉行嘅單車節係由新地冠名及慈善贊助，Adam瞓身推動，除咗每周操3日，以便喺10月11日完成由尖沙嘴起步，途經昂船洲大橋同青馬大橋後再返尖沙嘴，全程35公里嘅賽事，噚日中秋節翌日都親臨沙田天主教郭德勝中學，同近150個基層小朋友同家長分享踩車樂趣。
Adam話踩單車好好嘅親子活動，憶述細細個爹哋媽咪都會陪佢喺後花園踩有兩個輔助轆嘅單車，跌倒時會扶佢起身。喺史丹福大學讀書時則喺校園內以單車代步，但同參加挑戰賽有啲唔同，呢次要嘅係power加速度，難怪要加操。
梁教練大讚Adam進步神速，時速由最初一個鐘25公里去到一個鐘40公里，接近運動員速度。Adam就話次次都係40、50人一齊練習，令佢明白合作嘅重要性，唔係個個爭衝線，需要互相扶持，同人生一樣。
佢仲話有時踩到唔夠水兼又熱又濕，或者會想放棄，但諗番起朋友嘅扶持就會繼續，藉此勸勉小朋友，「一定要爭氣」，強調人生路途崎嶇不平，正如佢自己同公司最近都有逆境，藉踩單車須向前望為例，呼籲大家向住標竿直跑。
李八方
mailto:[email protected]