前冠軍騎師潘頓黑開有條路，呢日同葉楚航鬥做二奶，後者頭五場有四個第二，而潘頓唔好得幾多，繼第五場「真慷慨」、第七場「盈利駿馬」出擊跑第二後，到了第八場三班千二米，佢騎2.3倍大熱門沈廐「永旺年年」，重蹈第七場「盈利駿馬」覆轍，輸拉士一步屈居亞軍，分別只係佢第七場追唔切人哋，今場則係放頭畀「幸運日」追過。
無論如何，「永旺年年」繼上季六月斷纜不敗之身被破後，呢場換潘頓都係贏唔番，反為再由郭能操刀之4.7倍次熱門東廐馬「幸運日」，卻後發先至氣走大熱門「永旺年年」，人馬合作7次1冠3亞2季，僅一次落第。
呢場第三名由雷神策騎告廐「僥倖」取得，第四名係何澤堯座騎「最新鮮」，全場最熱四駒包辦四重彩，只得二千三百幾蚊派彩。
另一方面，葉廐團體馬「君子協定」這場雖落第，但馬主團體部份成員包括貌似明星陳法拉之靚女，仍接受「幸運日」馬主何壽基邀請，一齊拉頭馬分享喜悅。