咩叫殺得性起，你睇柏寶點贏馬就知，第六場佢騎18倍冷門高廐馬「藍雪山」鬥贏郭能同韋達之後，第七場三班泥地千二米，隨即以徐廐8.7倍半冷「飛躍之駒」，影相氣走1.8倍擂台躉潘頓座騎「盈利駿馬」，一手包辦第六口孖寶，惟派彩只得866.5元，比二串一獨贏過關少708元。
「藍雪山」與「飛躍之駒」帶挈柏寶季內首度起孖，「飛躍之駒」亦係繼「團圓飛舞」後，呢日第二匹八歲頭馬，服役累積六捷全贏泥地短途，相反「盈利駿馬」1.8倍連捷落空，四歲馬爭跨季三連勝失手。「盈利駿馬」追足一條直路都追唔到「飛躍之駒」輸短馬頭位，柏寶過終點時笑笑口望向外側之潘頓，似有戲弄嘲笑同鄉之嫌，而後者繼第五場「真慷慨」屈居亞軍後，呢日第二次做阿二，截至此場仲未有馬贏。
今場4.7倍之「心花怒放」在黃皓楠胯下慢閘，追入一席全無威脅之第三名，第四名係冷門初次跑泥之「劍凌雲」，四重彩派八千九百幾。