自從貴價茶餐廳翠華（1314）喺2012年底上市之後，近年都聽到唔少食肆諗住上市，總之大家都對整隻上市公司殼發生濃厚興趣。咁當然喇，上市公司殼長期都有價有市，好似經營西餐廳Harlan's、同埋喺九龍站ICC有間日本爐端燒餐廳田舍家嘅JC Group（8326），最近就好似有啲動作。
呢間公司2013年底上市之後，大股東一路有減持，直至上月減持到25.75%，唔再係公司控股股東。公司跟住又話，佢哋計劃開展新能源業務，當中可能包括太陽能發電技術研發、太陽能發電站建設等等，希望令業務多元化。咁由飲食做到太陽能，咁又真係幾多元化㗎。