城大師生、校友同員工一向熱衷長跑，參加馬拉松嘅城大人越嚟越多，大學特別為此成立「城大毅跑會」，加強推廣馬拉松精神。毅跑會特別喺上周五舉行成立典禮暨兩公里環校跑，校長郭位、校友兼毅跑會主席魏華星，當日聯同嘉賓率領一班城大人環繞城大校園跑咗兩公里（圖），有逾百城大學生、教職員同校友參加。郭校長致辭時仲以馬拉松比喻人生，鼓勵城大人全力以赴，跑好人生嘅馬拉松。據知郭校長每年都率領師生、校友參加本地或海外馬拉松，增強校園凝聚力。