周日德甲賽事，多蒙特主場對達斯泰特喺最後一刻被追和2:2，連續兩場失分下，已經落後榜首拜仁慕尼黑四分。不過，佢哋嘅射手奧巴美揚（左）就連續七場有入球，將佢嘅德甲開季後連續入波場數紀錄刷新到七場。
多蒙特開波就壓逼對手，不過反而俾達斯泰特以一個反擊先入一球。半場後，多蒙特以曼聯借將贊奴沙入替馬高列奧斯，佢哋只係用咗26分鐘，奧巴美揚就成功梅開二度反先對手。不過去到補時階段，佢哋後防又出現問題，結果俾對方嘅艾達蘇路喺門前混戰中射入追平。多蒙特失分之後下場就會作客拜仁上演榜首大戰，對方射手羅拔利雲度夫斯基，同奧巴美揚都係季初入波停不了，到周日碰頭真係要睇吓邊個勁啲。