【本報訊】買一盒月餅來慶祝中秋節，相信是不少市民的習慣，但有巿民卻換得一盒疑似過期的月餅。陳先生(化名)於上周二以月餅劵換領兩盒厚福集團雙黃白蓮蓉月餅，惟晚上返家準備拆開品嚐，竟發現食用到期日為去年10月，罐底未有顯示出產來源地及製造商資料，擔心月餅食壞人，向食環署投訴撿走化驗，涉事食店解釋是製造商錯誤取用去年剩餘餅罐造成誤會，遂已銷毀約十二盒「過期」月餅，並就事件致歉。
記者 郭美華 梁瑞帆
60歲的陳先生每年獲好友贈送月餅，今年則首次獲贈兩張厚福集團的月餅券，查詢得悉該集團有9間酒樓分店，其中一間「潮福蒸氣石鍋」位於旺角通菜街的分店，上周二(22日)下午遂由沙田家中乘車前往，換領2盒原價138元的四個裝雙黃白蓮蓉月餅。
同晚陳的兒子提議一同品嚐月餅，他遂拿出餅盒察看盒底食用期限，竟發現「此日期之前食用」標明是2014年10月8日，「我諗咗一吓，今年係2015年喎，我再搵老婆仔女睇，係咪我眼花呢，但個個都睇到2014年喎，於是我打開盒蓋，睇吓月餅包裝有無寫到期日，但又無寫喎。」他批評過期近一年太誇張，連出產地和生產商亦無標明，不能接受。「差咁遠，一年喎，係咪用咗舊年嘅餅盒？佢又無寫邊度製造，究竟係咪中國製？」
陳先生即時致電該店查詢，但接聽職員態度惡劣，「佢無解釋點解係2014年，只係叫我換囉，好大聲話換囉，之後cut電話收線。」
陳生拆開月餅發現蛋黃乾身，「無咩油，乾憎憎好細粒。」雖聞不出異味，但仍擔心月餅品質有問題，「唔敢食，仔女要返工，食咗肚屙點算？」兒子當晚致電食環署投訴，翌日(23日)由食環署職員上門拿取走其中一盒月餅化驗。陳生希望署方盡快查出結果，讓購買同款月餅的巿民安心。
本報記者在食環署取走月餅化驗的當日傍晚，佯裝顧客到通菜街分店購買雙黃白蓮蓉月餅，發現食環署職員在場調查，有侍應承認：「食環署check緊餅，佢驚我哋啲餅過期。」要求記者稍候，其後見食環署不准放售，改建議：「行到旺角道(分店)先有，佢唔畀我賣，hold住我啲貨唔放。」惟記者改至旺角道分店時，職員詢問經理後改稱：「呢隻賣晒啦！」着記者到其他餅店購買。
食環署發言人回應，根據《食物及藥物(成分組合及標籤)規例》，所有預先包裝食品需要標示食用日期，若違反規定出售過期食品，即屬違法，最高可被判罰款5萬元及監禁半年，而除非獲得豁免，否則所有預先包裝食物均須加上製造商或包裝商的姓名、名稱及地址等食物標記，如違例可被判罰款5萬元及監禁半年，署方已取走樣本化驗，正等候結果，並派員到被投訴的店舖巡查，未發現過期月餅，現將繼續跟進個案。
厚福集團發言人回應指，事件是供應商取用去年剩餘餅罐包裝月餅所致，已回收及停售所有印錯日期的月餅，將派員專人監測產品標準，對發生今次事件致歉。