電召車Uber早前遭到香港特區政府派出「慈母」拘捕司機，但身為特區政府第一家庭千金嘅梁齊昕，繼續不按常理出牌，噚日竟然無視慈母嘅下馬威，電召Uber車、由禮賓府去中環文華酒店，聽講齊昕喺呢程車中，仲質疑Uber司機兜路，特首辦截稿前未有回應。
司機解釋因中環封路
八方噚日收到Uber司機報料，話收到梁齊昕call車嘅order，朝早11點由禮賓府到中環文華酒店；司機趁佢上車時，影咗張相開心些牙畀其他Uber司機。聽知情司機話，當時中環因一個活動封路，要由禮賓府先落灣仔然後再去中環文華，但齊昕一度質疑司機係咪兜路，司機就解釋封路嘅嘢冇辦法，要搭車落去文華，一定要咁兜喎。無論兜路與否，齊昕最終都用信用卡畀錢找數。
齊昕身體力行支持Uber，但係佢老爸就唔係喇。梁振英最信任嘅警隊，喺8月初展開「破繭」行動，拘捕多名Uber司機，話Uber司機「涉嫌非法駕駛汽車作出租」、「取酬載客用途及駕駛汽車時無第三者保險」，但未正式落案。身為特區政府嘅第一家庭，理應好好配合特區政府依法施政，點知齊昕竟然幫襯Uber，譚惠珠都講過啦，Uber有冇保險保障乘客先，何解有的士唔搭？八方問過特首辦，齊昕點解幫襯Uber，截稿前未有回覆。
李八方
mailto:[email protected]