外界盛傳立法會主席曾鈺成同特首梁振英不和，否則點會句句有骨似乎衝住CY嚟？但曾鈺成接受dbc數碼電台訪問，卻否認同CY關係惡劣，仲形容兩人關係「相當好」，話啱啱佢去馬爾代夫所住酒店，都係CY介紹。
咦，如果關係咁好，點解寫文時又成日「明窒暗寸」CY呢？曾鈺成咁樣回應：「四個字，『挑撥離間』啫，不嬲都有㗎啦。『剝花生』嘅人當然覺得你哋有交鬧就過癮。我寫文章要言之有物，有啲人話我暗喻乜乜盛盛，就等他們各人去演繹囉，冇問題㗎。」
話梁特未必吼自己智庫
咁之前佢話如果後生10年會選特首，「睇你點整我」，係咪針對CY？曾鈺成就話喎：「我諗有啲所謂梁振英後面嘅支持者做一啲嘢，梁振英未必一定好同意、亦未必一定好開心。」曾鈺成講過佢嘅智庫會做研究，希望下屆特首選舉時，有候選人做政綱，佢話如果CY想將佢智庫研究放政綱，佢唔介意，問題係：「有冇興趣吼我哋就係另一回事啦！」