練馬師阿Man文家良，今季首四個月簽法國老將巫斯義為主帥，每位馬主要夾2,000蚊，作為阿巫嘅薪金，但呢對組合暫時只贏一匹「常勝龍王」，喺快活谷4.6倍建功，不過「歡樂小子」、「人和家富」跑到第二，成績都算過得去，今戰(28日)佢哋攜手四駒，包括「旅英公爵」、「有鬥志」、「風雲」及「無可奉告」，鬥志方面自然唔使懷疑，尤其「有鬥志」三月跑第二，公認有上佳質素，但之後兩度退出比賽，至今已缺陣半年，文家良自然心急向馬主交代，今次賽前快跳、試大閘等工夫做到足，正係巫斯義報答馬主科水請佢做主帥嘅好機會。
不過唔係個個馬主都like阿巫，據知文廄有八隻馬嘅馬主，並冇夾錢請阿巫做主帥，頭場「大眾良駒」嘅楊麗明，正係其中之一，所以今次隻馬亦非阿巫騎，而係配郭能。
其實楊女士咁做都好易理解，「大眾良駒」有個最佳拍檔郭能，人馬合作8次獲1冠2亞4季1殿，例有獎金收，令隻馬變咗提款機咁，對楊女士嚟講，郭能先至係正牌主帥，今次仲要抽個有利5檔，睇怕係建功嘅黃金機會。