非洲鼓澎湃激昂嘅鼓聲，真係可以振奮人心。師承國際著名西非鼓宗師Mamady Keita嘅關文亮，今年擔任康樂文化事務署社區文化大使，特別籌辦「非洲鼓樂木人巷」培訓班，以中學生為對象，希望透過到社區表演，令佢哋變得更開朗。佢早前就同學員去到長沙灣一間長者中心以鼓聲為「老友記」慶祝生日，有長者話見到年輕人落力演出，自己都後生廿年。
關文亮覺得學生嘅表演係咪精采並唔重要，最欣慰係佢哋可以用音樂做媒介，將互不相識嘅人聯繫起嚟。「社區文化大使計劃」每年都會邀請本地藝術家或藝術團體擔任社區文化大使，籌辦針對特定社群或個別社區嘅活動，促進社區藝術發展。關文亮同學員年底前亦會到訪不同社區，延續鼓舞人心之旅。