條傻佬站在西鐵候車屏幕前不停自我語言，縱使語調基本上平和，無謂惹事上身其他乘客都老遠避開，就他自己做講者兼聽眾。
保持距離，自己雙耳只算半個聽眾……
三十三個香港先至等於一個省（香港如此細，三十三個香港？大概四分一個廣東都填不滿，更遑論其他，如四川等大省！）三十三個省移民湧來，香港如何承受得起？
坐地鐵、西鐵、的士永遠冇位冇車，服務晒啲新移民同水貨客……
好想提醒個阿叔：夠啦，夠啦，發言未免偏頗，得罪周邊好多人啦，小心未落車先被扑濕！
阿叔根本沒留意身邊有其他乘客，眼神向前，自得其樂，完全當正西鐵車廂是Hyde Park（話時話，香港家陣仍奉行自由發言的，是嗎？）
唓！怕香港人去中國化？
如果中國係父母，香港係兒女，邊度有兒女努力整走父母啫？如果父母冇問題。（又未傻得晒喎！）
阿媽阿爸雖然窮，我地細細個都要幫手串膠花、煮飯、做家務、照顧細佬細妹。不過有書讀有飯吃，父母沒左右每日生活模式，也沒指定結交什麼種類朋友，只要不是壞人，就是小小壞沒被感染跟隨學壞便成。除了粗話罵人，更未特別禁止不准說這、不准說那，總而言之自由自在。
爸媽提供如此自由發揮空間，點會去父母化？
嗱，中秋啦，記得返屋企同阿爸阿媽過節食飯啊，細路！
吓，邊位？
西鐵剛過美孚站，下車的乘客比較多，環顧四周無幾人，心諗：阿伯，我點都唔算細路咯，多謝。
阿爸阿媽都去咗賣鹹鴨蛋，屋企冇咁好運過節開餐啦！
條傻佬將前頭說過的話，很環保，不斷循環再用，在下連半個聽眾的身份，亦自動收工，車到尖東就此打住。離開車廂，獨自淡入長路細味阿伯也未傻得晒發言內容，承佢貴言，多希望自己有幸回家陪伴父母過節、吃飯……
傻嘅咩，去父母化？
我爸媽雖非十全十美，如能膝下承歡，就是多一天，銀不換、金不換、白金鑽石都不換！