由楊澤怡（Shirley）、潘穎琳（Mizaki）、李詩詠（Ceci）同周葆諭（Christy）組成嘅香港四人女子組合FFx，因為一首《Sugar Baby》嘅廉價MV而一夜爆紅，MV喺YouTube嘅點擊率，截至噚日下晝已經衝破220萬，相當犀利。
獻出水着第一次
《蘋果動新聞》上星期幫FFx全新打造嘅MV《衝啦！Baby 》亦大獲好評，唔少網民都讚佢哋喺舞蹈編排導師黎偉倫（Dee Lai）指點後大有進步，所以《蘋果動新聞》再接再厲，趁中秋佳節送多首FFx嘅《沙灘Baby》陪大家過中秋。之前FFx啲舞姿俾網友笑似「天線得得B」，今次佢哋索性「天線得得B」上身，着埋同色泳衣，跳舞畀大家睇！
Shirley話：「我哋入咗行差唔多兩年，今次係第一次着泳衣，將第一次畀咗《蘋果日報》讀者！」而Mizaki就話知道要着泳衣拍MV之後，節食咗幾日，因為唔想拍出嚟有肚腩，Ceci就話：「一定會努力再減，但我成日有水腫，𠵱家會每日飲齋啡去水腫！」有高登女神美譽嘅Christy，拍攝當日着咗件小背心，好鬼保守，佢解釋話：「因為答應咗學校唔會着泳衣畀記者影相，我好聽話㗎！」
另外，鄭欣宜前晚素顏玩最近好hit嘅17直播，有網友叫佢唱《Sugar Baby》，欣宜唔單止即刻唱幾句，仲讚FFx好努力，而趙學而、林芊妤（Coffee）、松岡李那、謝婷婷都有素顏玩17，學而仲唔介意爆住瘡咁玩，真係勇氣可嘉。
撰文：馮仁昭
