黃昏的銅鑼灣如常熙來攘往，拿着皮球的陳偉豪一臉嚴肅地拍照。一年前，他既無政治立場，亦無選民資格，佔中只為湊熱鬧、尋真相；今日佔中一周年，出乎意料之外，雨傘運動凝聚出來的香港心惠及港足，接連坐滿旺角場，令代表隊球員越踢越團結，不再像以往未打先降，現在是，輸也要輸得有尊嚴。
陳偉豪從Sogo走小段路到食肆受訪，有途人會行注目禮；33歲、六呎高的他透露，去年佔中期間曾在銅鑼灣及金鐘兩地出現，沒有人認得他是港足隊長，正如港足一向也無認受性。偉豪說：「我哋其實同踢街場啲人冇大分別，只係比佢哋叻少少，以前踢港足真係威嗎？最威只係對過一啲國際級球星。人哋話球場如戰場，以前邊有戰場？我哋比賽係扯定白旗。」
政治冷感變熱血選民
傘運前，偉豪政治冷感，連登記做選民也沒試過，其冷感自小培養，因為香港一向太平，每年的七一遊行，他覺得少自己一個不少，不反對也不參加。只是，去年佔中到中後期，他在南華會練習完畢，便拿着飯盒到銅鑼灣佔領區坐，他笑說：「買咗飯盒，都要搵地方食！」
其實促使偉豪到佔領區，是事件越鬧越大，他要親身看個究竟：「講真，初初係湊熱鬧，亦想親身睇睇各報章傳媒報道嘅真確性。好多報紙都話佔中人士野蠻，但我體驗係另一回事，從未見過香港人咁有禮貌，反而反佔中嗰啲連廣東話都唔鹹唔淡，成日搞事。」
偉豪絕非人云亦云，他認為特區政府有很多改善空間，例如排山倒海的大陸人「鳩嗚」，令香港亂成一團。他表示自己也是受害者，簡單如為兒子買尿片、奶粉，都因為大陸客狂掃後缺貨，令自己苦惱萬分：「傘運後至少等特區政府知道，香港人好有決心、亦好團結去爭取一啲應該要爭取嘅事。」
傘運後更團結支持港足
傘運後，偉豪認為香港人的本土意識是前所未有的強，更團結了一大群香港人去支持本地足球；從六月打後的數場在旺角場舉行的世盃外，6,000多人的球場，次次爆滿，球迷的支持更令一班球員越來越團結、越來越一條心。他說：「我𠵱家出街，會有人問我隻腳好番未。球迷𠵱家嘅諗法係『你哋代表我哋香港人，請加油！』連帶我哋全隊人都感覺到，𠵱家係為香港人而戰，每場比賽都係出去fight。」
偉豪半自嘲的說，以前踢代表隊沒有代表性，下周踢世盃外，誰人代表、對手是誰全部不知道，球隊上下也沒有人關心，出外比賽未入球場就舉白旗，自願做「俘虜」。傘運令港足每一人，無論是正選、後備、職員，整隊都變得團結齊心，他說：「𠵱家每場比賽都會挺胸抬頭，不論對手，我哋都會同你死過，就算死都死得有尊嚴。」
保證每場都用心踢
問及2000年開始做大港腳的偉豪，是否等了很久才等到現在的「翻生」感覺，他又半說笑的答：「我唔係等咗好耐，根本冇諗過會發生嘅事，何來等呢？」正如偉豪所說，踢代表隊沒有物質的回報，但球迷的歡呼聲、掌聲雷動的打氣聲，都是金錢買不到的精神回報，令我們踢得開心。偉豪說出一句：「咁先係球員嘛！」多少感受到這位中堅隊長終於踢出一片天的心聲。
這一年，偉豪登記了做選民，因體驗到一人行一步，力量會變大；正如港足，要承接場場爆滿的威勢，都是要每個人多走一步。作為球員，當然成績掛帥，作為球迷，就一定要接受港足會有低潮，不是每場都能踢得有聲有色。他說：「我哋做球員可以向球迷保證嘅，就係每一場都會用心踢，但現實係港足比起其他國家，進步係慢，球迷要有耐心去支持我哋，踢得好，就拍多幾吓手，踢得唔好，鬧少兩句已經唔錯。」偉豪希望，入場睇波會漸漸成為香港人的娛樂及習慣，大家一起努力吧！
後記：開心上A1
今次訪問，偉豪令小記刮目相看，工整的五官下，說話出奇地幽默有趣，就像港足因世盃外成為本報港聞版頭條數天，他說：「大佬！上幾日喎，你去中環裸跑先有A1，唔死人冧樓都唔會頭版啦！」偉豪坦言港足上頭條是開心事，只可惜核心問題仍未解決，就是欠缺場地，希望特區政府盡快解決。
記者：曾雁平、徐嘉華
攝影：張柏基
《雨傘一周年》: http://umbrella.appledaily.com